Thursday, March 6, 2014

မရိဟာန ရဲစခန်းသို့ တစ်ခေါက်





ကတ္တဗ္ဗမေ၀ိဒန္တိ အရိယဘာဝံ နိဿာယ ပ၀တ္တိတံ ပဏီတံ” “ဤကဲ့သို့သော ကုသိုလ်ကောင်းမှုများမှာ လူကောင်းသူကောင်းများ ပြုသင့်ပြုထိုက်သည့် အမှုများဖြစ်သည်” ဟု နားလည်သဘောပေါက် လက်ခံကာ ပြုမှသာ အထွဋ်အမြတ်ဆုံး ပဏီတကုသိုလ်ဖြစ်သည်။ (၀ိသုဒ္ဓိမဂ်၊ပ၊ ၁၃၊ ဥတ္တမပုရိသဒီပနီ ၁၃)

(၁)

ထိုနေ့က မထင်မှတ်ဘဲ မရိဟာနရဲစခန်းသို့ ရောက်သွားခဲ့သည်။ အမှန်အားဖြင့် ရဲစခန်း၊ ရုံးကန်ကလနား၊ တရားရုံး၊ ရပ်ကွက်ရုံး စသည့်နေရာများမှာ ရှောင်လွှဲ၍မရသည့်အခါမှသာ သွားလေ့ သွားထရှိ သည့် နေရာများဖြစ်သည်။ ဖြစ်နိုင်လျှင် ထိုနေရာများကို မသွားလိုကြ။ ရုံးဝန်ထမ်းများမှ အပ စိတ်အားထက် သန်စွာဖြင့် ရဲစခန်းကို မည်သူမျှ သွားချင်ကြမည် မဟုတ်ပေ။ သို့သော်…သူ ကတော့ ထိုနေက မရိဟာနရဲစ ခန်းသို့ စိတ်အားထက်သန်စွာ သွားဖြစ်ခဲ့သည်။

(၂)

သံရုံးဝန်ထမ်းများ၏ ပြောပြချက်အရ သီရိလင်္ကာနိုင်ငံ မရိဟာနရဲစခန်း တွင် မြန်မာငါး ဖမ်း ရေလုပ်သား များရောက်ရှိနေသည်ဟု သိရသည်။ ငါဖမ်းရေလုပ်သားများမှာ ပင်လယ်ပြင် တွင် တစ်လကျော်မျောနေခဲ့ပြီး သီရိလင်္ကာနိုင်ငံရေလုပ်သားများက ကယ်တင်ထားခဲ့ကြသူများ ဖြစ် သည်။ သူတို့သည် ပင်လယ်ပြင်တွင် ၂၄ ရက်တိတိ မည်သည့်အစားအစာမျှ မစားခဲ့ရ။  ဆာလွန်းမက ဆာလာသည့်အခါ ပင်လယ်ရေ ကို ပေါင်းခံ၍သောက်ကာ အသက်ဆက်ခဲ့သူများ ဖြစ်သည်။ သီရိလင်္ကာနိုင်ငံ ရေပိုင်နက်ထဲရောက်လာ သည့်အခါမှသာ မိုးရေသောက်ခွင့်ရခဲ့သည်။

သို့သော် ထိုမိုးရေကိုလည်း လွယ်လွယ်ကူကူနှင့်ရခဲ့သည်တော့ မဟုတ်။ မိုးရွာနေသည့်အချိန် ဖာင်ခေါင် မိုးပေါ်တက်ကာ သက်စွန့်ဆံဖျား မိုးရေခံရသည်။ မိုးရေခံနေစဉ် ခေါင်းမိုးပေါ်က ပြုတ်ကျလျှင် ပင်လယ်ပြင် ကြီးထဲ သို့သာ။ ဖောင်ဘေးသို့ ငါးမန်းကြီးများ တကြိမ်တကြိမ်ပေါ်လာ တတ်သော်လည်း သူတို့အ တွက် ရွေးချယ်စရာနည်းလမ်းမရှိ။ သူတို့ကြုံတွေ့ခဲ့ရသည့် ဒုက္ခများကို စာဖွဲ့လျှင်ပင် မပြည့်စုံဟု တစ်ယောက် ကပြောသေးသည်။ ထိုသို့ဖြင့် ကမ်းမမြင်ရသည့် ပင်လယ်ပြင်တွင် တစ်လကျော်ကြာပြီးနောက် သူတို့သည် မသေကောင်း မပျောက်ကောင်း သီရိလင်္ကာနိုင်ငံ ရောက်လာခဲ့ကြသည်။ 

(၃)

သီရိလင်္ကာနိုင်ငံရောက်လာသည့် ရေမျောငါးဖမ်းလုပ်သားများမှာ ၇ ယောက်တိတိဖြစ်သည်။ လေးယောက် မှာ သီရိလင်္ကာနိုင်ငံ တောင်ဘက်ပိုင်း ဂေါမြို့ဆိပ်ကမ်း ရောက်လာခြင်း ဖြစ်သည်။ ကျန်သည့် သုံးယောက် မှာ သီရိလင်္ကာနိုင်ငံ၏ အရှေ့မြောက်ပိုင်း ထရန်ကိုမာလီဆိပ်ကမ်းရောက် လာခြင်း ဖြစ်သည်။ ထရန်ကို မာလီကမ်းရောက်လာသည့် သုံးယောက်ထဲမှ တစ်ယောက်မှာ နောက်ထပ်သုံးရက်ခန့် ပင်လယ်ပြင်တွင် ဆက်မျောနေပါက မျှော်လင့်ချက်မရှိတော့ဟု သိရသည်။ ကံကောင်းထောက်မစွာ ထရန်ကိုမာလီ ကမ်းရောက်ပြီး ရဲစခန်းမှ ဆေးရုံသို့ပို့ပေးခဲ့သည်။ သက်သာ လာသည့်အခါမှ ထရန်ကိုမာလီထောင်ထဲတွင် ထိန်းသိမ်းစောင့်ရှောက်ကာ မြန်မာသံရုံးကို အကြောင်းကြားခဲ့သည်ဟု သိရသည်။

ထိုအခါမှ တာဝန်ရှိသူများက ရေမျောငါးဖမ်းလုပ်သားများမှာ မြန်မာစစ် မစစ် သွားရောက်စစ် ဆေးခဲ့သည်။ ယနေ့အချိန်တွင် မြန်မာစစ် မစစ် စစ်ဆေးရန်မှာ လည်း လွန်စွာလိုအပ်နေသည့် အချိန်ပင် ဖြစ်သည်။ အ မည်အမျိုးမျိုးဖြင့် မြန်မာနိုင်ငံသားဖြစ်လို သူများ များစွာရှိသည်မဟုတ်ပါလား။ သံရုံးအရာရှိများ စစ်ဆေး ပြီးနောက်  မြန်မာများ စစ်မှန်သည့်အတွက် လိုအပ်သည့် အကူအညီများ ပေးအပ်ခဲ့သည်။ ထရန်ကိုမာ လီ ထောင်နှင့် ဂေါမြို့ရဲစခန်း တွင်ရောက်နေသည့် ရေမျောငါးဖမ်းလုပ်သားများကို ကိုလံဘိုမြို့အနီး တွင်ရှိ သည့် မရိဟာန ရဲစခန်းသို့ ပြောင်းနေခွင့်ရအောင် သံရုံးမှ ကူညီပေးခဲ့သည်။ 

မရိဟာနရဲစခန်း ရောက်လာသည့်အခါ သံရုံးမှ မြန်မာ့ရိုးရာအစားအစာများ၊ ကော်ဖီမစ်၊ ဆေးလိပ်၊ ကွမ်း၊ ဆပ်ပြာခဲ၊ သွားတိုက်ဆေး၊ သွားတိုက်တံ နှင့် လိုအပ်သည့်အခါသုံးနိုင်ရန် သီရိလင်္ကာရူပီး တစ်ထောင် နှုန်း ဖြင့် သွားရောက်ကူညီကြသည်။ ထို့နောက် မြန်မာနိုင်ငံ အမြန်ဆုံးပြန်ခွင့်ရအောင် ကူညီဆောင်ရွက် ပေးကြသည်။ သို့သော် ရဲစခန်းတွင်လည်း မြန်မာရေမျောငါးဖမ်းလုပ်သားများ ကဲ့သို့ အကြောင်းအမျိုးမျိုးဖြင့် ရောက်နေကြသူများမှလည်း ဒုနှင့်ဒေးပင်။

ထို့ကြောင့် ရဲစခန်းရောက်နေသူများမှာ ထမင်းဝအောင် မစားရကြ။ ပိုက်ဆံရှိသူများမှာ ထမင်းမ၀သော် လည်း ပူစရာမလို။ ကိုယ်တိုင် ထွက်ဝယ်ကာ စားရုံသာ။ မြန်မာရေမျောငါးဖမ်းလုပ်သားများမှာ ပင်လယ်ပြင် တွင် မျောလာကတည်းက အ၀တ်တစ်ထည် ကိုယ်တစ်ခုကလွဲလို့ ပိုက်ဆံဆိုသည်မှာ ဗလာနတ္ထိ။ “မြေနိမ့်ရာလှံစိုက်” “ကံဆိုးမသွားရာ မိုးလိုက်လို့ရွာ” ဆိုသည့်စကားပုံများမှာ သူတို့အတွက် တမင်ရည်ရွယ် ကာ စပ်ခဲ့သလားဟုပင် ထင်ရသည်။
(၄)

မြန်မာရေမျောငါးဖမ်းလုပ်သားများ ထမင်းဝလင်အောင် မစားရသည့်အကြောင်း သံရုံးဝန်ထမ်းများ တဆင့် ကြားသိရသည့်အခါ သူ့ ဇာတိရပ်ရွာတွင် ပင်ပန်းစွာလုပ်ကိုင်စားသောက်နေရသည့် မိဘဆွေမျိုးများကို သတိရဖြစ်သည်။ အကယ်၍များ..ရေမျောလုပ်သားများမှာ သူ၏ ဆွေမျိုး ဖြစ်ခဲ့လျှင်…..။ သူ တစ်ညလုံးလိုလို အိပ်မပျော်ခဲ့။ ကုတင်ပေါ်ဟိုဘက်လှည့် ဒီဘက်လှည့်နှင့် အ ချိန်ကုန်သွားခဲ့သည်။ မနက်လင်းကာနီးမှ အိပ်ပျော်သွားခဲ့သည်။ မနက်စောအိပ်ရာထပြီး ခေါင်းထဲ ချက်ချင်းရောက်လာသည်မှာ  ရေမျောငါးဖမ်းလုပ် သားများ ထမင်းဝအောင် မစားရသည့် အကြောင်းပင် ဖြစ်သည်။ 

ထိုအကြောင်းကို သူငယ်ချင်းများအား ပြောဖြစ်သည်။ ထို့နောက် သူငယ်ချင်းများနှင့် အတူ ကာလဒါန ငါးမျိုးအကြောင်းပြောဖြစ်သည်။ ကာလဒါနဆိုသည်မှာ ဂုဏ်ပကာသန ထည့်မတွက်ဘဲ လိုအပ်သည့်အရာ ကို လိုအပ်သည့်အချိန်တွင် လိုအပ်သည့်သူများအား လှူဒါန်း ခြင်းဟု ဖွင့်ဆိုလျှင် မှားမည်မထင်ပေ။ ကာလ ဒါနငါးမျိုးတွင် “ဒုဗ္ဘိက္ခဒါန” ဟူသောဒါနတစ်မျိုးလည်း ပါဝင်သည်။ ဆိုလိုရင်းမှာ အစာရေစာရှားပါးနေ သည် ကို သိသည့်အခါ ပေးကမ်းလှူဒါန်းခြင်းဟူ၍ ဖြစ်သည်။ သူငယ်ချင်းများ နှင့် ကာလဒါနအကြောင်း များ ပြောဖြစ်ပြီးနောက် ရေမျောငါးဖမ်း လုပ်သားများအား တက်နိုင်သရွှေ့ စုပေါင်းကာ လှူဒါန်းကြမည်ဟု ပုဗစေတနာပြဌာန်းကာ ဆုံးဖြတ်ခဲ့ကြသည်။ 

ထို့သို့ဆုံးဖြတ်ပြီး အခြားသော သူငယ်ချင်းများကို ချက်ချင်း အကြောင်းကြား ဖြစ်သည်။ အများစု မှာ စေတနာထက်သန်စွာ လှူဒါန်းကြသည်။ အလှူငွေများ မျှော်လင့်ထားသည် ထက်ပိုကာ မြန်မာငွေ ကိုးသိန်းခန့်နှင့်ညီမျှသည့် သီရိလင်္ကာရူပီး(၉၀၀၀၀)တိတိ ရလာသည်။ ရလာသည့်အလှူငွေများကို မြန် မာရေမျောငါးဖမ်းသမားများအား  တစ်ယောက်တစ်သောင်းနှုန်းစီ (မြန်မာငွေ တစ်သိန်းနှုန်း စီခန့်) ၀မ်းမြောက်ဝမ်းသာစွာ လှူဖြစ်ကြသည်။ တစ်ယောက်တစ်သောင်းစီလှူပြီး ပိုသည့်သီရိလင်္ကာရူပီး (၂၀၀၀၀) တိတိကို မြန်မာသံရုံးမှ အရာရှိအား ပေးအပ်ခဲ့သည်။ ထိုငွေများဖြင့် အရာရှိမှ ရေမျောငါးဖမ်း လုပ်သားများ အပြန်လေယာဉ်ပေါ်တွင် ၀တ်ဆင်ရန် ဘောင်းဘီ စသည်များ ၀ယ်ယူလှူဒါန်းမည် ဖြစ်သည်။ 

အလှူငွေများ လှူဒါန်းစဉ် ကိုရင်ငယ်ဘ၀က သင်ခဲ့ဖူးသည့် လောကနီတိ၊ မိတ္တကဏ္ဍလာ မိတ် ဆွေစစ် မိတ်ဆွေကောင်းအဖြစ်တိုင်းတာရန် သတ်မှတ်ထားသည့် “ရောဂါတုရေစ ဒုဗ္ဘိက္ခေ ဗျသနေစ သတ္တုဂ္ဂဟေ၊ ရာဇဒွါရေ သုဿာနေစ ယေ တိဋ္ဌန္တိ သုမိတ္တကာ” ဟူသော ဂါထာကို သတိရဖြစ်သည်။ ဆိုလိုရင်းမှာ အနာရောဂါဖြစ်နေသည့်အခါ၊ အစာရေစာရှားပါးနေသည့်အခါ၊ ဗျသနတရာများနှိပ်စက်ခံနေရသည့်အခါ၊ ရန်သူ့လက်အတွင်းကျရောက်ကာ ခိုကိုးရာမဲ့ဖြစ်နေသည့် အခါ၊ အမှုရင်ဆိုင်နေရသည့်အခါ နှင့် နာရေးကိစ္စ များကြုံလာသည့်အခါ ဖေးမကူညီကာ မားမားမတ်မတ်ရပ်တည်ပေးသူများသာ မိတ်ဆွေကောင်းမည် သည်ဟူ၍ ဖြစ်သည်။  

ဘ၀၏လွတ်မြောက်မှုမရသေးသည့် သံသရာခရီးသွားဖော်အချင်းချင်း မိတ်ဆွေကောင်းဖြစ်ခွင့် ရခြင်း အတွက် သူ ၀မ်းသာရသည်။ မြတ်ဗုဒ္ဓကိုယ်တော်တိုင်ကလည်း မိတ်ဆွေကောင်းနှင့် သာ ပေါင်းသင်းဆက် ဆံ ခွင့်ရပါက လောကီကောင်းကျိုးချမ်းသာများ ရာနှုန်းပြည့် ပြည့်စုံနိုင်သည်ဟု သံယုတ္တနိကာယ်၊ ကလျာဏ မိတ္တသုတ်တွင် မိန့်တော်မူခဲ့သည် မဟုတ်ပါလား။

(၅)

အလှူရေစက် လက်နှင့်မကွာပြုလုပ်လေ့ရှိသော မြန်မာများမှာ လှူရတန်းရမည်ဆိုလျှင် အတင်းအကြပ်တိုက် တွန်းစရာမလိုကြ။ ရက်ရောစွာ ပေးလှူလေ့ရှိကြသည်။ သို့သော်လည်း အများစုမှာ သဒ္ဓါနှင့် ပညာကို မျှတ စွာကျင့်သုံးလေ့မရှိကြ။ မဏ္ဍပ်တိုင်တက်ပြရန်နှင့် မိမိတို့နာမည် ကောင်းရရေး၊ ဂုဏ်သတင်းကျော်စောရေး အတွက်သာ လှူလိုကြသည်။ ထိုကဲ့သို့ ဂုဏ်သတင်း ကျော်စောခြင်းကို မျှော်လင့်တောင့်တကာ ပြုလုပ် သည့်ကုသိုလ်များအား ယသကာမတာယ ပ၀တ္တိတံ ဟီနံ” အညံ့စား အနိမ့်စား ကုသိုလ်သာဖြစ်သည်” ဟု ပါဠိစာပေများတွင် ဖော်ပြထား သည်။  

သို့သော်လည်း မြန်မာအများစုမှာ ထိုသဘောတရားများကို နားမလည်ကြ။ နာမည်ကြီး ဆရာတော်များမှ လှူချင်သည်။ နှစ်လုံး သုံးလုံးချဲဂဏန်းပေးသည့်ဘုန်းကြီးများနှင့် ဗေဒင်ယတြာ ဘုန်းကြီးများကိုလှူမှ အကျိုးရှိ သည်ဟု အယုံလွန်ကြသည်။ သာသနာ့ရေသောက်မြစ်သဖွယ်ဖြစ် သော စာသင်သား ရဟန်းသာမဏေများ အား မလှူလိုကြ။  မိဘမဲ့ဂေဟာများတွင် မလှူလိုကြ။ ကမ္ဗည်း စာတမ်းလူမြင်သာသည့်နေရာမှသာ လှူချင် သည်။ ကမ္ဗည်းထိုးမပေးသည့်အခါ မလှူလို ကြ။  စေတီပုထိုးများလှူမှသာ ကုသိုလ်ရသည်ဟု အယူသီးကြ သည်။ စာကြည့်တိုက်အတွက် အလှူခံလျှင် မထည့်ချင်ကြ။  ဘုန်းတော်ကြီးကျောင်းဆောင် ဆောက် လုပ်သည့်အခါမှသာ လှူချင် ကြသည်။ ရပ်ရွာအတွက် အမှန်တကယ်လိုအပ်သည့် စာသင်ကျောင်းနှင့် ကုဋီအိမ်သာများ ဆောက်လုပ်ရာတွင် မလှူချင်ကြ။  ရပ်ရွာအတွင်း လမ်းတံတားများပြင်ရန်အတွက်ဆိုလျှင် လှူဒါန်းရန် ၀န်လေးကြသည်။

 မြန်မာအများစုမှာ သဒ္ဓါတရားများရှိကြသော်လည်း ပညာနည်းကြသည်။ သဒ္ဓါလွန်ကဲ ပညာနည်း အလွဲ လွဲဖြစ်တတ်သည် မဟုတ်ပါလား။   ထို့ကြောင့်ပင် ဆရာဇော်ဂျီက တို့တိုင်းပြည်ကဗျာတွင် “တို့ရွာ တို့မြေ တို့ရွာမြေ၀ယ်၊ စေတီစပါး များလည်းများ၏၊ များပါလေလဲ တမွဲမွဲနှင့်၊ ဆင်းရဲကာသာ ကာလကြာလျှင်၊ ယာစကာမျိုး တညှိုးညှိုးနှင့်၊ ပုထိုးမြင့်မောင်း ကျောင်းကြို ကျောင်းကြား၊ လှည့်လည်သွားလျက်၊ မစားလေရ ၀မ်းမ၀၍၊ ဆွမ်းမျှမတင်နိုင် ရှိမည် တည်း” ဟု ဆိုထားခဲ့ခြင်း ဖြစ်သည်။ 

(၆)

ရဲစခန်းကအပြန်တွင် သူ၏စိတ်များ လွတ်လပ်ပေါ့ပါးနေသည်။ ၀မ်းမြောက်ဝမ်းသာဖြစ်နေသည့် သူတို့၏ မျက်နှာများကို မြင်ယောင်ရင်း ကြည်နူးရသည်။ အမှန်အားဖြင့် မစည်ကားသင့်သည့် နေရာများတွင် အပါအ ၀င်ဖြစ်သော ရဲစခန်းများကို သူ မသွားချင်ပါ။ သို့သော် အမှန်တကယ် အတိဒုက္ခရောက်နေသူများကို သံသ ရာခရီးသွားဖော်မိတ်ဆွေကောင်းတစ်ယောက်အနေနှင့် သွား ရောက်ကူညီခွင့်ရမည်ဆိုပါလျှင် စိတ်အား ထက်သန်စွာဖြင့် သူ နောက်ထပ်လည်း သွားဖို့ကြိုးစား နေဦးမည်သာ ဖြစ်ပါသည်။ ။

Read More...

Sunday, February 2, 2014

ရေကြည်ရာ မြက်နုရာ







(၁)

သူ မြန်မာနိုင်ငံမှာရှိနေစဉ်က “ရေကြည်ရာ မြက်နုရာ” ဆိုသည့် စကားလုံးလေးကို တခုတ်တရ သတိမထား မိခဲ့ဟု ရိုးသားစွာဝန်ခံရမည် ဖြစ်သည်။ ထိုစကားလုံးလေးကို  သတိထားမိချိန်မှာ ၂၀၁၀ ခုနှစ်တွင် ဖြစ် သည်။ ထိုနှစ် ကျောင်းပိတ်ချိန်တွင် သူငယ်ချင်းနှင့်အတူ မလေးရှားနိုင်ငံ၊ စင်္ကာပူ နိုင်ငံတို့ကို သွားဖြစ် သည်။

(၂) 

မလေးရှားနှင့်စင်္ကာပူနိုင်ငံတို့တွင် အလုပ်လုပ်နေသည့် မြန်မာအမြောက်အမြားကို တွေ့ခဲ့ရသည်။ အထူး သဖြင့် မလေးရှားတွင် အလုပ်လုပ်နေသည့်မြန်မာများမှာ ပို၍များသည်ဟု သူ ထင်သည်။ သို့ သော် သူ သိ ရသလောက် ကာယအလုပ်သမားများမှာ  အများစုဖြစ်သည်။   ဥာဏအားဖြင့် အဆင့်မြင့်မြင့် အသက်မွေး ၀မ်းကြောင်းပြုသူများမှာ မရှိသလောက်ပင် ဖြစ်သည်။  ကာယအလုပ် သမားတို့သည် ကာယ အားကိုးဖြင့် သာ  အသက်မွေးဝမ်းကြောင်းပြုရသည့်အတွက် ဘ၀ကို ခါးသီးစွာ ဖြတ်သန်းနေရသူများဟု ပြောလျှင် မှားမည်မထင်ပါ။ မလေးရှားရောက်တုန်းရောက်ခိုက်တွင် သူတို့နှင့် ပွင့်လင်းစွာ စကားပြောဖြစ်ခဲ့သည်။ ခက်ခက်ခဲခဲ ဖြတ်သန်းနေကြရသည့် သူတို့၏ဘ၀အမောများကို စိတ်ဝင်စားစွာ နားထောင်ဖြစ်ခဲ့သည်။

သူတို့နှင့် စကားပြောရင်း သိလာရသည်မှာ သူတို့သည် “ရေကြည်ရာ မြက်နုရာ”ရှာကြရင်း မလေးရှား ကိုလာကြခြင်းပင် ဖြစ်သည်။ သို့သော် သူတို့ရှာနေသည့် “ရေကြည်ရာမြက်နုရာ”ကို တွေ့သူမှာ အနည်းစု သာဖြစ်သည်။ အများစုမှာ ရေခြားမြေခြားတွင် မှန်းချက်နှင့်နှမ်းထွက်မကိုက်ဖြစ်ကြ ရပြီး ရောက်သည့်နေ ရာမှာ ကြုံရာအလုပ်ဖြင့် ဘ၀ကို ဖြစ်သလိုရုန်းကန်နေကြရသည်။ ထိုသို့ ဘ၀က ထင်ထားသလို မဖြစ်သည့် အခါ  အများစုက အရက်ယမကာများ မှီဝဲခြင်းဖြင့် မိမိတို့၏ ဘ၀ဒုက္ခများကို မေ့ဖျောက်ဖို့ ကြိုးစားကြ သည်။ 

ထိုအခါ    “စိတ်ညစ်လို့ အရက်သောက်၊ အရက်သောက်လို့ စိတ်ညစ်” ဆိုသည့် သံသရာဝဲဂယက်ထဲမှ ရုန်းမထွက်နိုင်ဖြစ်နေသည့်သူများကိုလည်း တွေ့ခဲ့ရသည်။ သူတို့ဘက်ကကြည့်လျှင်လည်း မျိုးစုံ ကြုံတွေ့နေရသည့် အခက်အခဲပေါင်းများစွာ၊ ဖိအားပေါင်းများစွာ အောက်တွင် စိတ်ညစ်သည့် သံသရာက ထွက်ဖို့ဆိုသည်မှာ အတော်ပင်မလွယ်သော အလုပ်ဖြစ် သည်။

ထို့အပြင် သူတို့မှာ အကြောက်တရားများနှင့်သာ နေ့စဉ်ရှင်သန်ရသည်။ ပတ်စ်ပို့ကိုင်ကာ တရား ၀င် နေထိုင်ခွင့်ရသော်လည်း အပြစ်မရှိအပြစ်ရှာကာ ငွေညှစ်လေ့ရှိသည့် မလေးရှားရဲကိုကြောက် ရသည်။ အော်ပရာစီ(လှည့်ကင်း)၀င်မည်ကိုလည်း ကြောက်ရသည်။ အလုပ်ရှင်ကိုလည်း ကြောက် ရသည်။ ခေါင်းပုံဖြတ်မည့် မြန်မာအချင်းချင်းကိုလည်း ကြောက်ရသည်။ ပွဲစားကိုလည်း ကြောက်ရသည်။ မည်သည့်နေရာသွားသွား လုံခြုံမှုနှင့်ပတ်သက်ပြီး အာမမခံရဲ။ 

ပြဿနာများ ဖြစ်လာပါက  မြန်မာနိုင်ငံသားအားလုံး၏ အားထားရာဖြစ်သည့်မြန်မာသံရုံးကိုလည်း ထင် သလောက် အားကိုး၍မရ၊ သတ်မှတ်ထားသည့်ဘောင်အတွင်းကသာ ကူညီနိုင်သည်။ ထိုထက်ပိုကာ မျှော် လင့်၍ မရ။  “ဆူးပေါ်ဖက်ကျ ဖက်ပေါက်၊ ဖက်ပေါ်ဆူးကျ လည်း ဖက်ပေါက်” ဟူသော မြန်မာစကားပုံမှာ သူတို့အတွက် ရည်ရွယ်ခဲ့သလားဟုပင် ထင်ရသည်။ တရားမ၀င်နေထိုင်ကာ အလုပ်လုပ်ရသော ပတ်စ်ပို့မ ရှိသူများဆိုလျှင် တွေးဝံ့စရာပင်မရှိ။ ပြဿနာ တစ်စုံတစ်ရာဖြစ်လာပါက လည်စင်းခံရုံမှတပါး ရွေးချယ်စရာ အခြားနည်းလမ်းမရှိ။ “မြန်မာနိုင်ငံမှာသာ ဒီလိုနေပူမိုးရွာမရှောင်အဆင်းရဲခံကာ အလုပ်လုပ်လျှင် ဒီထက်ပိုပြီး ကိုယ်စိတ်နှစ်ပါးချမ်းသာနိုင် တယ်” ဟု ပွင့်အံကျလာသည့် သူတို့၏ နောင်တများအတွက် ၀မ်းနည်းမိရုံကလွှဲပြီး နှစ်သိမ့်ပေးစရာ စကားလုံး သူ ရှာမတွေ့ခဲ့။ 

(၃) 

ထိုသို့ သူတို့၏ ခါးသီးလှသည့်ဘ၀အကြောင်း ထွေရာလေးပါး ပြောဆိုကြပြီးသည့်နောက် စကားဝိုင်းက ဘာသာရေးဆီသို့ ဦးတည်သွားသည်။ အကြောင်းအမျိုးအမျိုးကြောင့် နိုင်ငံရပ်ခြားတွင် စီးပွား ရှာနေကြသော်လည်း ဘာသာရေးနှင့်ပတ်သက်လာလျှင် ရေရေရာရာ တိတိကျကျ ဂဃနဏ မသိကြ၊ ဘာ သာရေးအသိအမြင် အားနည်းလွန်းလှသည်ကို သတိထားမိသည်။ ဗုဒ္ဓဘာသာဝင်များဖြစ်၍ အကြမ်းဖျင်းအားဖြင့် ကုသိုလ် ကောင်းမှုများပြုလုပ်ရမည့် အကြောင်းတော့ သိသည်။ ၀ါရိတ္တသီလ ဟု ခေါ်သည့် ငါးပါးသီလ အကြောင်းများလောက်တော့ သိသည်။ သို့သော် ဘ၀ကြီးပွားတိုး တက်ဖို့ လိုအပ် သည့် ဖြည့်ကျင့်ရမည့် စာရိတ္တသီလများကိုတော့ လိုက်နာကျင့်သုံးရမှန်းပင် မသိကြ။ သံသရာခရီးသွား အချင်းချင်း ကူညီရိုင်းပင်းလျှင်လည်း စာရိတ္တသီလကျင့်သုံးခြင်းပင် ဖြစ်သည်ကို သူတို့ သဘော မပေါက်ကြ။ 

အမှန်အားဖြင့် စာရိတ္တသီလဆိုသည်မှာ ဗုဒ္ဓဘာသာဝင်များအတွက် အထူးအဆန်းကြီးတော့ မဟုတ်။ စာရိတ္တသီလဟုပြောခြင်းကြောင့်သာ သူတို့အတွက် နားစိမ်းနေကြခြင်း ဖြစ်သည်။ ကလေး သူငယ်များ ၏ ကျောင်းသုံးဗလာစာအုပ်နောက်ကျောတွင် ပုံနှိပ်ထားသည့် မိဘကျင့်ဝတ်၊ သားသမီး ကျင့်ဝတ်၊ ဆရာကျင့်ဝတ်၊ တပည့်ကျင့်ဝတ်၊ မိတ်ဆွေကျင့်ဝတ်၊ လင်ကျင့်ဝတ်၊ မယားကျင့်ဝတ် စသည် တို့မှာ စာရိတ္တသီလများပင် ဖြစ်သည်။ ထိုထိုသော ကျင့်ဝတ်များမှာ သိင်္ဂါလောဝါဒသုတ်လာ စာရိတ္တသီလ များ ကို ရှေးမြန်မာပညာရှိကြီးများက မြန်မာများနှင့်အကျွမ်းတ၀င်ဖြစ်အောင် ကဗျာစပ် ထားကြခြင်း ဖြစ် သည်။ သူ သတိထားမိသလောက်တော့ မြန်မာနိုင်ငံရှိ ဗုဒ္ဓဘာသာအများစုသည် ဗုဒ္ဓဘာသာတို့၏ လူမှုရေး၊ စီးပွားရေးကျင့်စဉ်ကို ထင်ဟပ်စေရုံသာမက မိမိ၏ဘ၀ရပ်တည်မှုကိုပါ အဆင့်မြင့်တင်ပေးနိုင်သည့် သိင်္ဂါလောဝါဒသုတ်လာ အဆိုပါကျင့်ဝတ်များကို လက်တွေ့ လိုက်နာသူ ရှားပါးလွန်းလှသည်။

နိုင်ငံရပ်ခြားတွင် စီးပွားရှာသူဖြစ်စေ ပညာရှာသူဖြစ်စေ အရေးအကြောင်းဆိုလျှင် မိမိတို့အနီးတွင် ကူညီစောင့်ရှောက်မည့် မိဘညီအစ်ကိုမောင်နှများများ များသောအားဖြင့် မရှိကြ။ ထို့ကြောင့် “ခင်ရာဆွေမျိုး မြိန်ရာဟင်းကောင်း” ဟူသော စကားပုံအတိုင်း မိတ်ဆွေအချင်းချင်းကိုသာ အားကိုး အားထားပြုရသည်။ ထို့ကြောင့် မိတ်ဆွေကျင့်ဝတ်များကို မဖြစ်မနေ လိုက်နာကျင့်သုံးဖို့ လိုလာသည်။ မိမိကိုယ်တိုင် မိတ်ဆွေကောင်းပီသမှ မိတ်ဆွေကောင်းများကိုတွေ့နိုင်မည်မှာ ဓမ္မတာပင်ဖြစ်သည်။ မိတ်ဆွေကျင့်ဝတ်မှာလည်း ရိုးရိုးကလေးသာဖြစ်သည်။  ယင်းမှာ ပေးကမ်းချီးမြှင့်၊ ကိုယ်နှင့်ယှဉ်ထား၊ စီးပွားဆောင် ရွက်၊ နှုတ်မြွတ်ချိုသာ၊ သစ္စာမှန်စေ၊ ၀တ်ငါးထွေ ကျင့်လေ မိတ်သဟာ ဟူ၍ ဖြစ်သည်။ 

ထိုတွင် ပေးကမ်းချီးမြင့်ခြင်း ဆိုသည်မှာ ငွေကြေးအားဖြင့် ပေးကမ်းမှ ပေးကမ်းသည်ဟု မ ဆိုနိုင်ပေ။ နှုတ်၏စောင်မခြင်း၊ ကိုယ်၏စောင်မခြင်းတို့မှာလည်း ပေးကမ်းခြင်းတစ်မျိုးပင်ဖြစ်သည်ဟု သူ ယူဆ သည်။ သူ သတိထားမိသလောက် မလေးရှားတွင် တစ်ချို့တစ်ချို့သော မြန်မာများ မှာ နှုတ်၏ စောင်မ ခြင်း ကိုယ်၏စောင်မခြင်းများ မရှိကြ။  အကူအညီပေးသယောင်ယောင်ဖြင့် အခွင့် အရေးရသည်နှင့် အချင်းချင်း ခေါင်းပုံဖြတ်ကြသည့်သူများပင် ရှိနေကြသည်။ ဗုဒ္ဓဘာသာအလိုအရ ထိုသူများသည်  ရှောင်ကြဉ်ရမည့် မိတ်ဆွေတုများဟု ရှင်းရှင်းလင်းလင်းပင် သတ်မှတ်ထားသည်။

စစ်မှန်သောမိတ်ဆွေတို့သည် မိမိတို့နှင့်အတူနေသူများ အခက်အခဲများနှင့် ကြုံတွေ့ကြသောအခါ အကူအညီပေးလေ့ရှိကြသည်။ မြတ်ဗုဒ္ဓက…
(၁) ကျန်းမာရေးများ မကောင်းသည့်အခါ
(၂) ငတ်မွတ်ခေါင်းပါးဘေး ဖြစ်သည့်အခါ
(၃) စီးပွားရေးများ ပျက်ပြားသွားသည့်အခါ
(၄) ရန်သူ့လက်တွင်း ကျရောက်နေသည့်အခါ
(၅) တရားရုံးတွင် အမှုကိစ္စများရင်ဆိုင်နေရသည့်အခါ
(၆) နာရေး ကိစ္စများကြုံရသည့်အခါတို့တွင် ကိုယ်ရောစိတ်ပါ အပြည့်အ၀ အကူအညီပေးများကိုသာ မိတ်ဆွေစစ်ဖြစ်သည်ဟု ခွဲခြားပေးထားသည်။  

သို့သော် အများအားဖြင့် မြန်မာများမှာ အထက်ပါဘေး ရန်များ ကြုံလာသောအခါ အချင်းချင်းဖေးမ ကူညီကာ ရှေ့မှမားမားမက်မက်ရပ်တည်ပေးလိုခြင်း မရှိကြ။ ရေနစ်သူ ၀ါးကူထိုးလိုသူများသာ အတွေ့များ သည်။ ထိုနေ့က သူတို့နှင့် ဘာသာရေးအကြောင်းများဆွေးနွေးရာတွင်လည်း ဘာသာရေးကပေးနိုင် သည့် လောကီကြီးပွားရေးအကြောင်း တို့ကိုသာ အဓိကထားပြောဖြစ်သည်။ သို့သော် သူ့တို့သည် စီးပွား ရှာနေကြသူများဖြစ်ကြသော်လည်း ဒီဃဇာနုသုတ်လာ ဗုဒ္ဓ၏ကြီးပွားရေးလမ်းညွှန်ချက်များဖြစ်သည့် စီးပွား ရှာသူတို့  မဖြစ်မနေလိုက်နာကြရမည့် -
၁။ ဥဌာနသမ္ပဒါ- အချိန်မရွေး၊ ဒေသမရွေး၊ လုပ်ငန်းမရွေး အဆင်သင့်လုပ်ကိုင်ရန် ထကြွလုံ့လ၀ီရိယ ရှိနေခြင်း
၂။ အာရက္ခသမ္ပဒါ- ရလာသည့် ပစ္စည်းများကို မပျက်စီး မပျောက်ပျက်ရအောင် ထိန်းသိမ်းထားခြင်း
၃။ ကလျာဏမိတ္တသမ္ပဒါ- ကူညီမစမည့် မိတ်ကောင်းဆွေကောင်းများ၊ အရင်းအနှီး ထုတ်ပေးမည့်သူ များ၊ ကိုယ်နှုတ်ဖြင့် စောင့်ရှောက်မည့်သူများ ရှိခြင်း
၎။ သမဇီဝိတသမ္ပဒါ- ၀င်ငွေထွက်ငွေ မျှတအောင် သုံးစွဲတတ်ခြင်း ဟူသည့် နာမည်ကျော် သမ္ပဒါတရား လေးပါးကိုပင် မသိကြချေ။ 

ထိုလေးပါးကို ရှေးဆရာတော်များက “ရအောင်လည်းရှာ၊ ချွေတာစုဆောင်း၊ မိတ်ကောင်းရှိစေ၊ သုံးလေမျှတ၊ ဤလေးဝ မုချကြီးပွားကြောင်း” ဟူ၍ပင် လင်္ကာစပ်ခဲ့ကာ လက်ဆင့်ကမ်းခဲ့ကြသည်။ အမှန်အားဖြင့် ဤသမ္ပဒါတရားလေးပါတို့မှာ “ဥစ္စာဝင်လမ်း” ဟုခေါ်နိုင်သည်။ ထိုလေးပါးကို ကျင့်သုံး လျှင် ပစ္စည်းဥစ္စာများ အဆက်မပျက်ဝင်နိုင်သောကြောင့် “ဥစ္စာဝင်လမ်း”ဟု ခေါ်ခြင်း ဖြစ်သည်။ သို့သော် မြန်မာ အများစုမှာ “ဥစ္စာဝင်လမ်း”များကို မကျင့်သုံးဘဲ “ဥစ္စာထွက်လမ်း”များကို ကျင့်သုံး ကြသူများကို သာ တွေ့ရလေ့ရှိသည်။ “ဥစ္စာထွက်လမ်း”များမှာ
(၁) မိန်းမလိုက်စားခြင်း
(၂) အရက်သေစာ လွန်ကျူးစွာ သောက်စားခြင်း
(၃) လောင်းကစားခြင်း
(၄) အကျင့်ပျက်သူ သူယုတ်မာများနှင့် ပေါင်းသင်းခြင်း
(၅) အခြေအနေနှင့် အချိန်အခါမသိဘဲ သွားလာခြင်း
(၆) ပျင်းရိခြင်း တို့ဖြစ်သည်။  

ထို “ဥစ္စာထွက်လမ်း”များကိုသာ ကျင့်သုံးကြသည့်မြန်မာအများစုမှာ အမိမြေသို့ပြန်လာသည့်အခါ “ရေကြည်ရာမြက်နုရာ”များ ယူမလာနိုင်၊ ယူလာနိုင်သည်မှာ နောင်တများနှင့်ရောဂါများသာ ဖြစ်သည်။
သမဇီဝိတသမ္ပဒါနှင့်ပတ်သက်ပြီး မန်လည်ဆရာတော်က ဤလူတို့ဘောင်၊ အိမ်ရာထောင်တို့၊ မရှောင်ပူချမ်း၊ ကြိုးပမ်းဥစ္စာ၊ ရအောင်ရှာလျက်၊ လေးဖြာခွဲမှု၊ လေးဘို့ပြု၍၊ တစုခံစား၊ နှစ်စုအားလျှင်၊ စီးပွားယှဉ်ရာ၊ တစုမှာမူ၊ လိုခါနောင်ဘုိ့၊ မချို့ဆောင်ဘွယ်၊ မြေ၀ယ်မြုပ်ထား၊ ပြုအပ်ငြား၏ ဟု စတုဓာ ၀ိဘဇေ ဘောဂေ ဟူသော ဂါထာကို ဖွင့်ပြခဲ့သည်။ 

မြတ်ဗုဒ္ဓက ထိုသို့ လောကီကြီး ပွားရေးတိုးတက်ရေးနှင့်ပတ်သက်ပြီး လိုက်နာကျင့်သုံးရမည့်နည်း လမ်းများ ကို ဟောခဲ့သည်ဟု သူ ပြောပြသော အခါ ဇဝေဇ၀ါမျက်နှာများနဲ့ အံ့သြရိပ်သန်းနေသော သူတို့၏မျက်နှာ ကိုလည်း ယခုအချိန်အထိ  မြင်ယောင်မိဆဲ။ 

သို့သော် သူတို့သည် ၀ိပဿနာတရားများအကြောင်း ပြောကြသည်။ စူလသောတာပန် အကြောင်း ပြောကြသည်။ သောတာပန်အကြောင်း ပြောကြသည်။  နိဗ္ဗာန်အကြောင်းပြောကြသည်။ စီးပွားရေး လုပ်နေသည့်မအားမလပ်သည့်ကြားမှ ဒုလ္လဘရဟန်းဝတ်လိုကြသည်။ ဒုလ္လဘသီလရှင် ၀တ်လိုကြ သည်။  ဘာသာရေးအလုပ် လုပ်ချင်သူများကိုကား အားပေးပါသည်။ 

လူသည် ဘာသာရေးနှင့် ကင်းလို့မရ။ ဘာသာရေးနှင့်ကင်းသွားလျှင် ယဉ်နေသောစိတ်များပင် ရိုင်းသွားနိုင်သည်။ ထို့ကြောင့် လူသည် ဘာသာရေးကို လုပ်ကိုလုပ်ရမည်ဖြစ်သည်။ သို့သော် သာသာရေးကိုချည်း လုပ်နေ၍လည်းမရပေ။ သူ့အကန့်နှင့်သူသာ ဖြစ်သည်။  လူသည် လူအလုပ်ကို လုပ်ရမည်ဖြစ်သည်။ လူသည် လူအလုပ်ကို လုပ်မှ လူ့အသိုင်းအ၀ိုင်းတွင် လူလိုနေနိုင်မည်ဖြစ်သည်။ လူအ၀တ်ဖြင့်နေကာ ဘုန်းတော်ကြီးများလုပ်သည့် အလုပ်များကိုလုပ်နေလျှင် တနည်းနည်းဖြင့် တက်လမ်းများ ပိတ်ဆို့နေမည်သာ ဖြစ်သည်။ 

ထို့အတူ ဘုန်းတော်ကြီးများလည်း ဘုန်းတော်ကြီး အ၀တ်ဖြင့်နေလျှင် ဘုန်းတော်ကြီးများ၏ အလုပ်ကို သာ လုပ်ရမည်ဖြစ်သည်။ သို့မှသာ ဘုန်းကြီးအသိုင်းအ၀ိုင်းတွင် ဘုန်းကြီးပီသစွာ ရပ်တည်နိုင်မည် ဖြစ်သည်။ ထိုသို့ လိုက်နာကျင့်သုံးသင့်သည့်အရာများကို အချိုးကျစွာ လိုက်နာမှုမရှိခြင်းကြောင့် ယနေ့ လူ့အဖွဲ့အစည်းများတွင် “ကြက်လည်းမရောက်၊ ကျီးမမြောက်သား၊ အောက်ကလိအာ၊ အာကလိအောက်” အမျိုးအစားများဖြစ်သည့် “လူဘုန်းကြီး” နှင့် “ဘုန်းကြီးလူ” ဟူသော ကမောက်ကမများကို တွေ့နေ ရခြင်း ဖြစ်သည်။ 

အများအားဖြင့် မြန်မာအများစုမှာ ထိုသဘောတရားကို နားမလည်ကြဟုပြောလျှင် လွန်ရာကျ မည်မထင်။ ထို့ကြောင့် မလေးရှားတွင် စီးပွားရေးလုပ်ရန် လာနေသည့်အခိုက်အတန့်ကာလအတွင်းမှာ ဒုလ္လဘ ၀တ်ချင် သူများကို အားမနာစွာ ကန့်ကွက်ဖြစ်သည်။ စီးပွားရှာရန်လာသည့်ကာလအတွင်းမှာ စီးပွားရှာနေသည်မှာ အကောင်းဆုံးပင်ဖြစ်သည်။ အကယ်၍ ဒုလ္လဘရဟန်းဝတ်ချင်သည့် သဒ္ဓါပဗ္ဗဇိတ စိတ် အမှန်တကယ် ရှိသည်ဆိုပါက မြန်မာနိုင်ငံပြန်ကာ ရိပ်သာကျောင်းတိုက်များတွင်ဝတ်ခြင်း ထက် ကောင်းသောနည်းလမ်း မရှိဟု သူ ထင်သည်။ 

သူငယ်တော်တောရဆရာတော် မကြာခဏမိန့်တော် မူသည့် မအိုတော့ပေ၊ မနာတော့ပေ၊ မသေမဲ့ပုံ၊ ရှာပုံဓန၊ သုတစုံစုံ၊ သေမင်းဆံဆွဲ၊ ခေါ်စဲငင်ပုံ၊ မြတ်တရား၊ ရှုစားအားထုတ်ပုံ ဟူသော ဆောင်ပုဒ် ကလေးအကြောင်းကိုလည်း သူ ပြောပြဖြစ်သည်။ ဆရာတော်၏ဆိုလိုရင်းမှာ  စီးပွားရှာ၊ ပညာရှာ သည့်အခါတွင် မိမိရည်မှန်းထားသည့် ပန်းတိုင်မရောက်မချင်း မည်သည့်အခါမျှ မသေဟု သဘောထားကာ စီးပွားရှာ၊ ပညာရှာသင့်သည့်အကြောင်းနှင့် တရားအားထုတ်သည့် အခါတွင်မူ သေမင်းတမန်က မိမိ၏ဆံစကိုဆွဲကာခေါ်နေသည့်အလား ယခုချက်ခြင်းပင်သေတော့မည်ဟု သဘော ထားကာ တရားအား ထုတ်ရမည်ဟူ၍ ဖြစ်သည်။ သို့သော် အများစုမှာ ဤသဘောတရားများကို နားမလည်ကြ။ 

(၄) 

မလေးရှားတွင် သူ ခဏ ရောက်စဉ်ကာလအတွင်းမှာ ကံမကောင်းလို့ဒုက္ခရောက်သည်ဟုဆိုကာ ဘုရားမှာယတြာလာချေသူများကိုလည်း တွေ့ရသည်။ အမှန်အားဖြင့် ကံမကောင်းလို့ ဒုက္ခရောက်ခြင်း မဟုတ်ဟု သူ တော့ မြင်သည်။ မိမိလုပ်ချင်သည့်အရာများကို စိတ်လိုက်မာန်ပါလုပ်ပြီးမှ ကံအပေါ်ကို ပုံချသူများဟုသာ ပြောရမည်ဖြစ်သည်။ အများအားဖြင့် မြန်မာများမှာ ပတ်စ်ပို့မရှိဘဲ လျှောက်လည် သည်။ မသွားသင့်သည့်နေရာများသွားကြသည်။ မလုပ်သင့်သည့် အလုပ်များ လုပ်ကြသည်။ ထိုသို့ဖြင့် အော်ပရာစီဝင်သည့်အခါ ရဲ အဖမ်းခံရသည်။ ထိုအခါတွင် ကံမကောင်းဟုဆိုကာ ကံကို ပုံချကြသည်။

မဃဒေ၀လင်္ကာတွင် ကံဟုမူလ၊ သမ္ဗုဒ္ဓတို့၊ ဟောပြသည်မှာ၊ အရင်းသာရှင့်၊ ဥစ္စာဘောဂ၊ ဇီဝိတနှင့်၊ သုခပွားရန်၊ ဤလူဌာန်နှိုက်၊ ဥာဏ်ဝီရိယ၊ ပေယာဂတည့်၊ ကာလဒေသ၊ ပုဂ္ဂလကို၊ နှိင်းဆအပ်တုံ၊ ကံကို ယုံ၍၊ မီးပုံအတွင်း၊ မဆင်းထိုက်စွာ၊ ကျားရဲရာလည်း၊ ကြမ္မာအကြောင်း၊ မရိုးကောင်းရှင့်၊ သူဟောင်းရှေး က၊ ဆိုကုန်ကြ၏၊ လုံ့လမထူ၊ ဥာဏ်မကူဘဲ၊ အယူတချောင်း၊ ကံတကြောင်းမျှ၊ မကောင်းလည်း ကံ၊ ကောင်းလည်းကံဟု၊ ကံကိုချည်းသာ၊ မကိုးရာဘူး၊ ပညာဥာဏ်ဖြင့်၊ သင့်မသင့်ကို၊ အခွင့်ရှု၍၊ အပြုလုံ့ လ၊ ယှိအပ်စွတည့်။ (မဃဒေ၀ ၂၄၅) ဟု မန်လည်ဆရာတော်က သတိပေးဆုံးမတော်မူခဲ့သည့် အကြောင်း ပြောပြဖြစ်သည်။  

မဃဒေ၀လင်္ကာမှာဆိုထားသည့်အတိုင်း မြတ်ဗုဒ္ဓက ကံတရားကို မူလအရင်းခံအနေနှင့်ဟော ထား သော် လည်း အသက်ရှည်စွာ အနာမဲ့ရေး ရန်ဘေးကင်းကြောင်း ကောင်းမှုမင်္ဂလာ ဖြစ်ပွားစေရန်နှင့် ကိုယ်စိတ် နှစ်ပါး ကျန်းမာချမ်းသာစွာ နေရန်မှာ လုပ်သင့် မလုပ်သင့်၊ သွားသင့် မသွားသင့်၊ စားသင့် မစားသင့် စသည်ဖြင့် ဝေဖန်ဆုံးဖြတ်ရမည့် မိမိ၏ဥာဏ်ပညာနှင့် လုံ့လ၀ီရိယတို့အပေါ်တွင် တည် မှီကြောင်း၊ အရာရာမှာ ကံကိုချည်းပဲ ပုံချ၍မရကြောင်း၊ ကံကောင်းလျှင် မီးလောင်မည်မဟုတ် ဟု နှလုံးပိုက်ကာ မီးပုံအတွင်း ခုန်မဆင်းသင့်ကြောင်း၊ ကံကောင်းလျှင် ကျားကိုက်မည်မဟုတ်ဟုနှလုံး ပိုက်ကာ ကျားများနေသည့်တောသို့ မသွားသင့်ကြောင်း၊ အခြေအနေ အချိန်အခါတို့ကိုကြည့်ကာ လုပ်သင့် မလုပ်သင့် စသည့် စဉ်းစားဥာဏ်နှင့် လုပ်ကိုင်မှသာ ကြီးပွားနိုင်မည့် အကြောင်းများ ပြောဖြစ်သည်။ 

(၅) 

အမှန်တကယ်အားဖြင့် မြန်မာများမှာ နိုင်ငံခြားဟုဆိုလျှင် အထင်ကြီးပြီးသားပင် ဖြစ်သည်။ နိုင်ငံခြား တွင် မည်သို့နေထိုင်ရသည်၊ မည်သို့လုပ်ကိုင်ရသည်၊ မည်သို့စားသောက်ရသည်၊ မည်သို့ရှင်သန်ရ သည် စသည်တို့ကို မစဉ်းစားတော့။ နိုင်ငံခြားသို့ ထွက်ရတော့မည်ဆိုလျှင် အရှင်လတ်လက် နတ်ပြည် ရောက်တော့မည့်ပုံစံမျိုးဖြင့် မိုးမမြင်လေမမြင် ဖြစ်ကြသည်။ ပညာတော်သင် အနေဖြင့် နိုင်ငံခြားသို့ သွားခွင့်ရလျှင် မည်သည့်နိုင်ငံကိုမဆို ကောင်းပါသည်။ သွားသင့်ပါ၏။ မည်သို့မျှ အပြစ်ပြောစရာမရှိ၊ ဂုဏ်ယူဖွယ်ပင်ဖြစ်၏။ 

အသက်မွေးဝမ်းကြောင်းအတွက် အလုပ်သွားလုပ်မည်ဆိုပါက အနည်းဆုံး တရားဥပဒေစိုးမိုး သည့် နိုင်ငံများကိုသာ သွားသင့်သည်ဟု သူ ထင်သည်။ တရားဥပဒေစိုးမိုးသည့်နိုင်ငံများတွင် တင်းကြပ် သည့် စည်းမျဉ်းစည်းကမ်းများအရ လွယ်လွယ်ကူကူနှင့် ၀င်ခွင့်မပြုကြ၊ နိုင်ငံအတွင်း ၀င်ရောက် ခွင့် ပြုပြီးလျှင်လည်း လုံခြုံမှုအပြည့်အ၀ပေးနိုင်သည်။ တရားဥပဒေစိုးမိုးသည့် နိုင်ငံများတွင် “မိမိတတ် သည့်ပညာသည် မိမိ၏၀င်ငွေကို ကိုယ်စားပြုသည်” ဟူသော ဆိုရိုးအတိုင်း ပင်ဖြစ်သည်။ သိက္ခာရှိ စွာဖြင့် “ရေကြည်ရာမြက်နုရာ”ရှာနိုင်သည်။ မိမိတတ်ထားသည့်ပညာဖြင့် အသက်မွေးဝမ်း ကြောင်း ပြုလုပ်နိုင် သည်။ မည့်သည့်အနှောက်အယှက်မျှ မရှိနိုင်။ 

သို့သော် မြန်မာအများစုမှာ လွယ်လွယ်ကူကူနှင့်ဝင်ခွင့်ရသော မလေးရှား၊ ထိုင်း စသည့်နိုင်ငံတို့ကိုသာ အသွားများသည်။ မလေးရှား၊ ထိုင်းတို့ရောက်သွားသည့်အခါ မိမိတို့ထင်ထားသည့် နိုင်ငံခြားနှင့် တခြား စီပင် ဖြစ်သည်။ စိတ်ကူးယဉ်အိပ်မက်ထဲကနိုင်ငံခြားနှင့် လက်တွေ့လုပ်ကိုင်နေ ထိုင် စား သောက်ရသော နိုင်ငံခြားမှာ ပြဒါးတလမ်း သံတလမ်းပင် ဖြစ်သည်။ သို့သော် နောက်ဆုတ်၍မရတော့။ ဤကဲ့သို့သော နိုင်ငံခြားရောက်ဖို့ပင် လယ်ရောင်း၊ ယာရောင်း၊ လယ်ပေါင်၊ ယာပေါင် လုပ်ထားရ သည် မဟုတ်ပါလား။ 

ထို့သို့ဖြင့် သူတို့ရောက်သည့် နိုင်ငံခြားမှာပင် “ရေကြည်ရာမြက်နုရာ” ရှာကြရသည်။ သို့သော် “ချောင်းကို ပစ်၍ မြစ်ကိုရှာ ရေသာများ၍ ငါးမတွေ့သည့်ပမာ”  သူတို့ရှာဖွေနေသည့် “ရေကြည်ရာ မြက်နုရာ” ရှာမတွေ့ကြ။ သူတို့နေထိုင်ခဲ့ရာ သူတို့အမိနိုင်ငံကိုလည်း “ရေကြည်ရာ မြက်နုရာ”ဖြစ် အောင် လုပ် မပေးနိုင်ကြတော့။ သူ့မြေမှာ ဖြူပြာပွင့်ရင်ဖြင့် ငါ့မြေမှာ နီဝါတင့်ရမပေါ့  ဟူသော စိတ်ထား လည်း မထားနိုင်ကြတော့။ 

(၆)

အကြောင်းအမျိုးမျိုးကြောင့် မိမိဇာတိရပ်ရွာကို အခိုက်အတန့်စွန်ခွာကာ “ရေကြည်ရာမြက်နုရာ” နေ ရာဒေသများ သွားရောက်လုပ်ကိုင်ကြသူများကို သူ အပြစ်မမြင်ရက်ပါ။ “တရွာမပြောင်း သူကောင်း မ ဖြစ်” ဟူသော မြန်မာစကားပုံအတိုင်း “သူကောင်း” ဖြစ်ရန် “တရွာပြောင်း”ကြခြင်းကို ကြိုဆိုပါသည်။ သို့သော် လုံခြုံစိတ်ချမှုရှိသော၊ တရားဥပဒေစိုးမိုးသော၊ မိတ်ဆွေစစ်များရှိသော “ရေကြည်ရာမြက် နုရာ”နေ ရာဒေသများကိုရွေးချယ်၍ ပြောင်းစေလိုခြင်းသာ ဖြစ်ပါ၏။ ထိုထက်ပိုပြီး မျှော်လင့်ခွင့်ရှိမည် ဆို လျှင် အခိုက်အတန့်အားဖြင့် စွန့်ခွာခဲ့သော မိမိတို့ဇာတိရပ်ရွာကိုလည်း “ရေကြည်ရာမြက်နုရာ” ဒေသ ဖြစ်အောင် ဖန်တီးပေးနိုင်စွမ်းရှိသော “ရေကြည်ရာမြက်နုရာ” ရှာဖွေသူများ ဖြစ်ပါစေဟုသာ ………။   

Read More...